الطرق المثلى لتوفير البنزين

 

اكيد كلنا عايزين نوفر فى البنزين بالذات مع ارتفاع اسعاره المستمر , طبعا كتير مننا عارف طرق كثيره لتوفير البنزين , بس كتير مايعرفش طرق Hypermilers واصحاب هذه الطرق هم ناس هدفهم ان يقطعوا بالعربيه اطول مسافه لكل لتر بنزين ومرجعهم الاساسى هوارقام منظمة EPA وهى ارقام تقريبية لمتوسط استهلاك كل سيارة, وكانت بداية ظهورهم على موقع Clean MPG بهدف توفير البنزين والاقلال من العوادم , ولكن فى الحقيقة اول من ظهر من Hypermiler كان فى الحرب العالميه الثانيه اثناء ازمة الوقود سنة 1970

اود ان اذكر ان كل هذه الاساليب اختياريه ومن الممكن ان تنفع مع ناس وناس لأ , فكل واحد له طريقته الخاصه
ولكن عند التطبيق الصحيح فمن الممكن ان يصل معدل التوفير الى 25 % او اكثر .انا ابتديت اعمل كده ولقيت تحسن ملحوظ اوى ساكتب عنه لاحقا ان شاء الله

سوف اتناول 3 انواع من الاساليب

1- الاساليب الأولية
2- الاساليب المتقدمة , ودى اساليب للمحترفين فى القيادة وليس المبتدئين
3- اساليب جنونية وانا لا انصح بها ولكنى وضعتها فقط للعلم

الاساليب الأولية :

1- فى التأنى السلامة , ليس فى التأنى السلامة فقط ولكن توفير فى استهلاك البنزين ,فعندما تزيد السرعه عن 96 كم/س يزيد استهلاك النزين بمعدل كبير , فتقريبا كل زياده 10 كيلو عن هذا المعدل يزيد استهلاك البنزين بمعدل 10% ايضا .

2- لا تفرمل بشدة ولا تبدأ المشى بسرعة , فالتحرك السريع او الوقوف المفاجىء يستهلك بنزين بشراهه , فاحرص على ان تبدأ التحرك ببطىء وبسلاسه , واحرص ايضا ترك مسافه بينك وبين السيارات الاخرى لتجنب الوقوف المفاجىء, فالفرمله والتحرك العنيف يزيد من استهلاك الوقود بمعدل قد يصل ال 30% "فى الطرق سريعه" 5% "داخل المدينه"

3- لا تجعل العربيه دائرة عند الوقوف, اذا كنت ستتوقف اكثر من 7 ثوان فمن الافضل فصل العربيه , لان إدارة المحرك يأخذ من الوقود ما يعادل من الوقوف 7 ثوانى " فى العربيات الحديثه فقط ذات نظام الحقن الوقودى".

4- تجنب الرحلات القصيرة, بما أن موتور العربيه لا يعمل بكفاءة اذا كانت العربيه بارده ويستهلك بنزين اكثر فحاول التقليل من المشاوير القصيرة وممكن ان تتمشى "رياضه برده" او دمج عده مشاوير فى مشوار واحد والذهاب للمشوار الابعد فالأقرب.

5- قم بإزالة اى وزن زائد , لانه كل ما العربيه فيها وزن اكثر كل ما هاتبذل مجهود اكتر كل ما تستهلك بنزين اكثر , فحاول تشيل اى حاجة ليس لها فائدة وتكون بتوزن فى نفس الوقت

6- قلل من استخدام التكييف , فمن المعروف ان التكييف يزيد من استهلاك الوقود بنسبه من 10% الى 30% , ولكن فى حالات السفر ممكن تشغيله بدلا من فتح زجاج السيارة , لان فتح الزجاج يزيد من استهلاك البنزين فى حاله السير بسرعة .

7- لا تقف لتسخين السيارة , للسيارات الجديدة فقط لا تسخن السيارة اكثر من 30 ثانيه "يوجد بها تسخين اوتوماتيكى" ويفضل بالطبع الرجوع لمانيوال العربيه اولا.

8- حافظ على ضغط الإطارات , بالرجوع لمانيوال العربيه شوف ضغط الإطارات وضبطه ذى ما مكتوب بالضبط كل شهر بصورة دورية , ومن الممكن نفخ الإطارات نيتروجين فهو يحافظ على الضغط لمده اطول "تقريبا 6 شهور"

9- تجنب الطرق الغير ممهده , طبعا ده صعب عندنا بس حاول تمشى فى شوارع مسفلته ونظيفه.

10- حافظ على السيارة فى افضل حالة , عمل الصيانه الدورية للسيارة "تغيير فلتر الزيت , سلامة الموتور ,حساس الاكسجين ,ضبط زوايا..."

11- ضع البنزين ذو رقم الاوكتين الموصى به من الشركة الصانعه , فلا تضع بنزين أعلى من الموصى به فكثيرا من الناس لم يفرق معهم فى الإستهلاك او الفرق كان ضئيل مقارنه بفرق السعر .

12- قم بملىء البنزين من المحطات ذات السمعه الطيبه , او ممكن تجرب كذا بنزينه وتشوف احسن محطه ولا تقوم بالغش فى البنزين

13- قم بتثبيت سرعتك بقدر الإمكان Cruise Control, مع عدم زياده السرعه عن 96كيلو

اساليب متقدمة :

1- اتبع تقنيه "التزحلق مع التعشيق" ICE-ON coasting , فعندما تمشى بسرعه فوق الـ 30 والـ RPM فوق 1500 "الارقام تختلف من سيارة لأخرى" و تشيل رجلك من على البنزين والعربيه متعشقه "يعنى الفتيس مش متمور" ومش ضاغط دبرياج يعنى فيه Engine Braking , هنا العربية بتمشى من غير ولا نقطة بنزين خالص ...ايوا ولا نقطة بنزيين ... وده فى كثير من العربيات الجديدة ومنها طبعا الياريس ولكن ليس فى العربيات القديمة .

2- طريقة "التزحلق مع التموير" Nice-On Coasting وهى عبارة عن ترك السيارة تسير والفتيس فى وضع التموير وعدم الضغط على البنزين او الدبرياج فهنا استهلاك البنزين يكون قليل جدا جدا وهنا السيارة ستكون اكثر خفه وستقطع مسافه اكبر مقارنة بالاسلوب السابق

3- نظام اضغط واتزحلق Pulse & Glide وطريقته لما تكون ماشى فى طريق وهاتمشى على سرعه 80 مثلا فتروح ضاغط على البنزين الى ان تصل للسرعه المراده وطبعا الضغط يكون بهدوء "كده نظام الضغط" ثم ترك النزين خالص الى ان تصل لسرعه 60 "كده نظام تزحلق مع تعشيق" , فلو عملت كده يبقى نص الطريق انت مشيته من غير ولا نقطه بنزين يعنى هاتمشى الضعف وللعلم النظام ده هايوفر اكثر من تثبيت السرعه.

4- تثبيت الرجل على بدال البنزينDriving With Load , الطريقه دى مفيده عند صعود كوبرى فبدلا من الضغط زياده عند الصعود للحصول على نفس السرعه واستهلاك اكثر للبنزين قم بتبيت رجلك فقط على نفس المستوى ستلاحظ بالطبع ان السرعه ستقل ولكنها ستعود ثانيه بمجرد الصعود

5- إركن السيارة بحيث يكون وشها للخارجFace-Out Parking , عشان لما تطلع بالعربيه تطلع على طول "لتقوم بتسخين العربيه وانت ماشى" دون الحاجة للرجوع للخلف والضغط على الفرامل لان االسياره وهى بارده تستهلك بنزين اكثر .

6- لا تستخدم مضخم الصوت Amplifier , او اى اجهزة اضافيه غير الكاسيت لانها تستهلك كهرباء اكثر لان الجهاز بيحمل على موتور العربيه وبالتالى تستهلك بنزين اكتر

7- إركن فى مكان عال Potential Parking , لتقوم بالتحزلق عند بداية المشى بالسياره طبعا والعربيه شغاله.

8- اشتر سيارة موفرة فى البنزين , اذا كنت ستقوم بشراء سيارة قريبا فاحرص على السيارات الموفرة , فلا داعى للسيارات ذات القوة الكبيرة اذا كنت تريد سيارة عائلية ستنقلك انت واسرتك

9- استخدم جهاز مراقبة استهلاك الوقود , فسوف يفيدك لمعرفه افضل وقت سيارتك توفر فى الوقود ومن اشهر هذه الاجهزه هو ScanGauge

10- اخيرا فى كلام ان تغييرنوع الزيت لزيت تخليقى يقلل من استهلاك البنزين لانه اكثر لزوجه ويقلل من احتكاك اجزاء الموتور وايضا ماركة الزيت من شركة يفرق فى استهلاك البنزين من شركة آخرى "موبيل , شل ...." , كذلك تغيير نوع فلتر الهواء يؤثر على استهلاك البنزين

اساليبة خطيرة :

مبادىء خطيرة ومجنونة وغير آمنه تماما ولا انصح احد بتجربتها ولكنى وضعتها للعلم فقط وليكن الموضوع شامل لكل الطرق المعروفه

1- فصل العربيه وهيا ماشيه الى ان تقف وتسمى هذه الطريقة Forced Auto Stop
2- اتباع طريقه اضغط واتزحلق Pulse & Glide ولكن يتم فصل العربيه بدلا من ازاله القدم من على البنزين .. يعنى كل شوية وانت ماشى تفصل العربيه
2-زياده ضغط الكاوتش Overinflate tires بأقصى درجة يتحملها الكاوتش وهو الرقم المكتوب على الكاوتش نفسه وليس الموصى به فى مانيوال السيارة
3- ازالة الاطار الاحتياطى والعده والمرايات الجانبيه لتخفيف الوزن
4- السير خلف المقطورات لتقليل احتكاك الهواء بالسيارة
5- المشى بثبات على الخطوط البيضاء المدهونة على الاسفلت Ride the ridge عشان يقلل من احتكاك الكاوتش بالاسفلت وخصوصا فى الاجواء الممطره

بعض الاسئلة متعلقة بنفس الموضوع

س: ما هى أكثر سيارة موفرة فى البنزين ؟
ج : تختلف السيارات بإختلاف فئتها ولكن بالنظر للسوق الامريكى سنجد ان اكثر السيارات توفيرا فى البنزين هى السيارات من شركات تويوتا وهوندا (الياريس موجوده دائما فى الصدارة كأكثر عربيه متوسطه بتستهلك فى البنزين " , وبالنظر للسوق المصرى فأعتقد ان اكثر السيارات توفيرا ستكون من تويوتا ودايهتسو وهوندا

س: انا عربيتى جديدة بس استهلاكها عالى للبنزين؟
ج لا تحكم على السيارة الا بعد فترة التليين او فى بعض السيارات لا يظهر الاستهلاك الحقيقى الا بعد 5 الاف كيلو

س: ازاى احسب معدل الاستهلاك للبنزين ؟
ج: فول العربيه على الاخر وصفر عداد الرحلات "او اكتب العداد عامل كام لو مفيش عداد رحلات" وامشى بالعربيه لحد ما توصل لعلامه معينه انت تحددها فى مؤشر البنزين ... اكتب انت مشيت كام كيلو .. ثم فول العربيه تانى .. شوف كام لتر تم اضافتهم وبكده عرفت كام لتر استهلكتهم ..

يعنى مثلا لو مشيت 500 كيلو ولقيت ان فولت 40 لتر مثلا يبقى اللتر معاك بيعمل 500/40=12.5كيلو
يعنى الصفيحة بتعمل 250كيلو

شارك بتعليقك واعجابك خلال ايقونة فيس بوك وتويتر فى الشريط التالى